ماسك الشوفان والعسل والياغورت لنضارة البشرة الباهتة وترطيبها (مجرب )

كتير منا فهاد الصيف كتولي البشرة ديالنا باهتة، ناشفة، وفيها قشرة خفيفة من الشمس والماكياج والستريس. 

وكنقلبو على شي ماسك يرجع النضارة بلا ما يقشر البشرة بقوة وبلا ما يوعدنا بتبييض خيالي في يومين. 

الماسك اللي غادي نشارك معاك اليوم هو الماسك الوحيد اللي ممكن تعتامديه مرتين فالشهر، مكوناتو كلها من الكوزينة، اقتصادي، و مناسب حتى للبشرة الحساسة إلا درناه بالطريقة الصحيحة.

 الهدف ديالو ماشي يبيض البشرة درجة ولا جوج فنهار، الهدف ديالو يرطب العمق، يحيد الخلايا الميتة بلطف، ويرجع داك الضو الطبيعي ديال الوجه.

علاش هاد المكونات بالضبط؟ وشنو الدليل ديال المصداقية؟ا

لشوفان المطحون (خرطال): ماشي غير للأكل. الشوفان فيه مادة اسمها البيتا جلوكان، هادي كترطب الجلد وكتهدن الحكة والاحمرار. و حبيباتو الرقيقة كتدير تقشير خفيف بلا ما تجرح البشرة، وهادشي كتأكدو دراسات ديال طب الجلد. 

هو مناسب بزاف للبشرة اللي كتحسس من القهوة والسكر الحرش.

الياغورت الطبيعي بلا سكر: فيه حمض اللاكتيك، وهو حمض طبيعي خفيف كيساعد على تذويب الجلد الميت اللي كيخلي البشرة باهتة. و فيه البروبيوتيك اللي كيهضن ميكروبيوم البشرة. ضروري يكون طبيعي و بلا نكهة.

العسل الحر: مضاد طبيعي للبكتيريا ومرطب قوي. كيجذب الماء للبشرة وكيخليها مرنة. إلا ما كانش عندك الحر، استعملي عسل عادي ولكن يكون أصلي.

قطرتين زيت اللوز الحلو (اختياري): للبنات اللي بشرتهم ناشفة بزاف، كيعطي ليونة و كيمنع داك الاحساس ديال التيبس بعد الماسك.

هاد التركيبة متوازنة: الشوفان يقشر، الياغورت يجدد، العسل يرطب. يعني كنخدمو على 3 مشاكل فنفس الوقت بلا ما نستعملو مواد قوية.

المقادير المضبوطة (لوجه موحد):

1 معلقة كبيرة شوفان مطحون رقيق بحال الدقيق (إلا كان عندك شوفان عادي طحنيه فمولينكس)

1 معلقة كبيرة ياغورت طبيعي (مسوس)

1 معلقة صغيرة عسل حر

1 معلقة صغيرة ماء ورد (كتهدن و الريحة زوينة)

قطرتين زيت اللوز الحلو إلا كانت بشرتك ناشفة

طريقة التحضير:

فزلافة صغيرة، خلطي الشوفان والياغورت وخليهم 3 دقائق باش الشوفان يرطاب شوية وما يبقاش حرش. 

عاد زيدي العسل وماء الورد وخلطي حتى تولي عندك كريمة خفيفة. 

إلا كانت خفيفة بزاف زيدي شوية شوفان، وإلا كانت ثقيلة زيدي شوية ياغورت. الماسك ما خاصوش يقطر.

طريقة الاستعمال الصحيحة باش ما نضروش بشرتنا:هنا فين كيغلطو بزاف ديال البنات.

التنظيف قبل: غسلي وجهك بغسول خفيف ونشفيه بفوطة نظيفة. ما ديريش الماسك فوق الماكياج.

التوزيع: وزعي الماسك بصباعك على الوجه كامل وتفاداي منطقة تحت العين مباشرة حيث رقيقة. ما تديريش طبقة غليظة بزاف.

المدة: خليه 15 حتى 20 دقيقة كحد أقصى. ما تخليهش ينشف كامل ويولي كيتكسر، حيث إلا نشف بزاف كينشف معاه البشرة. 

ملي تحسيه بدا يشد شوية، هادي هي الوقت باش تحيديه.

طريقة الإزالة: وهادي أهم نقطة. ما تحكيش وجهك بقوة. فزكي يديك بماء دافئ وبداي تديري حركات دائرية خفيفة جدا باش الشوفان هو اللي يقشر، مش أظافرك. 

شطفي بماء فاتر، عاد رشي وجهك بماء بارد باش تسدي المسام.بعد الماسك: نشفي وجهك بالطبطبة ودهني مرطب خفيف اللي مولفة تستعمليه. و ضروري واقي الشمس فالصباح موراها، حيث ملي كنحيدو الخلايا الميتة البشرة كتولي حساسة للشمس.

شحال من مرة و فاش كتبان النتيجة بصراحة؟

هاد الماسك ما كيديرش نتيجة فورية ولكن  النتيجة الحقيقية كتجي بالمداومة.

من أول استعمال: غادي تحسي بملمس ناعم وترطيب، حيث العسل والياغورت كيرطبو فالبلاصة.بعد 3 حتى 4 مرات (يعني شهر ونص بمعدل مرة فالأسبوع): كتبدا البشرة الباهتة كتضوّى شوية، والمسام كيبانو نقيين، والماكياج كيشد مزيان حيث ما بقاش الجلد الميت.

للتصبغات الخفيفة ديال الشمس: خاصك الصبر 6 حتى 8 أسابيع مع روتين كامل فيه مرطب وواقي شمس يوميا. الماسك بوحدو ما كافيش.التكرار المنصوح به: مرة فالأسبوع للبشرة العادية والمختلطة، ومرة كل 10 أيام للبشرة الحساسة والناشفة بزاف. 

ما ديريهش كل نهار، التقشير بزاف كيضعف حاجز البشرة.

أخطاء شائعة خاصك تفادايها:ما تزيديش عليه الليمون الحامض باش تبيضي، الحامض مع الشمس كيدير تصبغات كثر.

ما تستعمليش شوفان ما مطحونش مزيان، الحبيبات الكبار كيجرحو البشرة.

ما ديريش الماسك إلا كانت عندك حبوب ملتهبة وحمراء بزاف، تسناي حتى تهدن.

هاد الماسك كيتحضر جديد كل مرة، ما تحتافضيش بيه فالثلاجة حيث فيه ياغورت.

لمن ما كيصلاحش هاد الماسك؟إلا كانت عندك حساسية من الشوفان (الغلوتين) أو من منتجات الحليب، تفادايه. 

ودائما ديري اختبار صغير وراء الودن قبل ما تعمميه على الوجه كامل.

باختصار، هادي وصفة ديال العناية والترطيب، ماشي وصفة ديال التبييض السحري. هي كترجع لبشرتك صحتها ونضارتها الطبيعية، وهادشي هو الجمال الحقيقي اللي كيدوم. جربيها والتزمي بواقي الشمس وغادي تشوفي الفرق بعينيك بلا ما تحتاجي فيلترات.